Sentru saúde Turiskai hakerek istória ida ne’ebé reprezenta esforsu, no difikuldade fasilidade saúde sira iha área rural ; 27 Maiu 2020.

Editor: dr. Maniv

Fonte Informasaun : Sentru Saude Turiskai, Manufahi

Liafuan Klásiku  komún iha dadalek Inglés “A Picture Worth Thousands Words” nia ezemplu iha realidade mak istória ne’ebe pesoal saúde no  komunidade   sira hakerek hela iha loron 27 Fulan Maiu tinan 2020 wainhira  sira servisu hamutuk atu fasilita ambulansia hodi disloka  Inan Isin rua ida husi suku Aitemua ba Sentru Saúde Turiskai.   fila fali  ba liafuan  “A Picture Worth Thousands Words”,   laran senti triste no orgullu kahur malu wainhira hare'e  imajén ambulansia ida para hela ida udan laran, dalan a'at  no tahu ne’ebé namdoras,   ho tali iha liman  mane forte (forte iha fíziku no mos forté husi fuan)  lubun ida mak hasán hela tali ne’e koko atu salva ema ida nia vida..   Sá lisaun  mak imajén ida ne’e oferese ;

1. Asaun. Hare husi sikun Profesionalismu: Pesoal saúde iha sentru saúde turiskai durante ne’e hasoru situasaun difisil sira hanesan ne’e i dalaruma mos a’at liu ida ne’e maibe sira nia vontade servisu, komitmentu no domin ne’ebé   maka’as,  supera tiha difikuldade hirak ne’e.

Komunikasaun no Partisipasaun Komunitaria: Pilar importante ida husi atensaun saúde iha nivel primaria mak partisipasaun komunitaria. Hanesan imajén ida ne’e hateten, no ita bele hare’e mos pesoal saúde iha ne’eba matenek iha  mobilizasaun komunidade,  nune’e  mos imajén ida hatudu katak en jeral komunidade Timor (en espesifiku Turískai) iha spíritu atu atu ajuda, nune’e sira  partisipa ativa hodi fo solusaun ba problema ne’ebé komunidade hasoru. Se servisu hamutuk ida ne’e nune’e bebeik,  no hala'o iha parte hotu-hotu iha sikun saúde ninian   maka progresu iha mehi no vizaun “Timor oan Saúdavel iha Timor Leste ida ne’ebé Saúdavel”  se  sai realidade katak sei la hela deit ho liafuan.     

2. Tarefa atu hanoin lisuk  

Se posivel fo resposta hodi  haloos no hadiak  dalan hirak ne’ebe sai pontu prinsipal atu transporta komunidade hirak ne’ebe hasoru problema saúde  nune’e hafasil knaar nain saúde sira nia servisu atu lori saúde ba ema hotu. Kestaun ne’ebe ita bele tau mak hanesan ne’e : To’o bainhira mak ita sei la lori tan  tali hodi dada ambulansia?  Se momentu hanesan rerprezenta iha imajén ne’e akontese bebeik no akontese iha situasaun hirak ne'ebé  laiha ema atu bele husu ajuda sá los mak sei akontese ba ema ne’ebé moras, no vida hira mak sei lakon lerek deit? Situasaun ida ne'e akontese deit iha Sentru Saude Turiskai ka? Akontese mos iha Sentru Saúde Seluk?  Makhusuk hirak iha  ne’e hanesan mensajén ida kabe ba leitor sira idak-idak atu foti konkluzaun tuir idak-idak nia perspetiva no kompetensia atu buka resposta.

3. Motivasaun no spíritu profesionalismu kontínua

Ami fiar katak difikuldade ida ne’e la akontese deit iha Sentru Saúde Turiskai, maibe iha fatin seluk iha Timor Laran moos akontese nune’e, no dalaruma balu mos laiha liu alternativa ne’ebe fasil liu atu hakat liu barrera sira. Husi Sentru Saúde Turiskai hakarak  hatutan deit katak motivasaun ne’ebé saseluk sira iha Sentru Saúde Turiskái uza mak  “Entre Devér no Domin  kahur ho profesionalismu bele  halakon poder husi obstákulu saída deít”  Hamutuk bebeik ho forsa ida ne’e  saúde Timor Leste sei lao ba oin.

                      Kréditu Imajén: Sentru Saúde Turiskai, Manufahi, 27, Maiu  2020 

Florence Nightingale “Lady with the Lamp” Istória husi nia moris to’o nia mate tamba moras Brucellosis

Hakerek nain ; Nivia de Pina Sarmento

Estudante Medisina Jeral, UNTL

Editor : dr. Manivblogs.'

 Florence Nightingale “Lady with the Lamp” Istória husi nia moris to’o nia mate tamba Brucellosis.

Florence Nightingale  moris iha  loron 12 Maiu 1820 iha Florence, Italia.  Florence Nightingale  hanesan oan ba daruak husi  husi  aman-inan   William Edward Nightingale no  Frances Nightingale, naran  Florence ne’e rasik hanesan naran sidade ne’ebé  nia moris ba. Nia bin naran Parthenope  ida ne’e mos naran sidade ida iha Italia. Maske moris iha familia bo’ot no riku maibe Folrense nunka halo an hanesan ema riku nia oan, nia uza nia tempu sira hodi ajuda ema kiik no kiak sira. (1–3)

Desde otas kiik kedan Florence hanesan labarik ne’ebe matenek. Nune’e nia aman tau atensaun ba nia hodi guia nia estuda istoria, Filozofía, no literatura sira. Nia   mos iha kapasidade ne’ebe aas iha matemátika no lingua nune’e nia iha abilidade atu lee no hakerek iha lian Fransia, Alemaña, Italiana, Gregu, no Latín. Florence iha ideolojia ne’ebe diferente ho labarik  sira iha tempu ne’eba, nia nunka satisfeitu ho ideia traditional ne’ebe tau feto sira hanesan “Dona da Casa” deit. Nune’e desde idade joven Florence  ativa iha Philantropy, preokupa ho ema kiik no kiak sira nia saúde no kondisaun moris, nune’e iha Florence nia fiar,(tuir referensia balu) sita katak wainhira nia kumpri tinan 17  nia sofre alterasaun mental ida ne’ebe nia  rasik konsidera hanesan “Maromak mak bolu nia” atu  tau matan  ba ema seluk,  nune’e mak nia konsidera nursing hanesan nia  vokasaun, nia aprosima ho nia aman-inan  atu nune’e bele eskola hanesan enfermera, maibe iha tempu ne’ebea nia inan-aman proihibe(la hatan),  tamba Florence nia familia nia status sosial ne’e  la permite feto sira atu halao labor hanesan ne’e, so permite deit sira atu kaben ho ema ne’ebe iha status sosial aas nune’e labele hamonu sira nia statu sosial ne’e, tamba servisu enfermera ne’e iha momento ne’eba kosidera hanesan servisu ema kiak nian.

Maibe  iha tinan 1849, Florense rejeita nia aman-inan nia hakarak ne’ebe atu halo nia kaben ho Richard Monkton Millnes, nia kontinua fiar iha nia vokasaun atu sai enfermera. Tan ne’e iha tinan 1850 nia vizita   Institution of Protestant Deaconesses in Kaiserswerth, Germany, ho ida ne’e hametin liu tan nia espiritu atu sai enfermera.

Iha inisiu tinan 1850 wainhira akontese funu Crimean (Crimean War) nia fila ba London, iha ne’eba  nia servisu hanesan enfermera iha Harley Street Hospital, nia hatudu performansia servisu ne’ebe kapaas tebes nune’e nia hetan promosaun hodi sai hanesan superintendente. Iha parte ida Florense mos servisu voluntaria iha hospital  Middlesex, ho misaun ida ajuda  promove no hadia kondisaun sanitaria hodi redús mortalidade durante surtu Cólera.(3,4)

Iha tinan 1854 wainhira iha  funu entre  soldadu Britania no Fransia kontra Rusia, soldadu Britania  rihun 18 mak  tama/baixa iha hospital militar, funu mos kontinua no soldadu sira ne’ebe moras no kanek laiha ema ida mak tau matan ba sira.  Iha fulan ikus sira tina 1854 Secretary of War Sidney Herbert  haruka karta ida ba Florense husu nia atu organiza organizasaun enfermeru sira atu nune’e bele ajuda soldadu sira ne’ebe hetan afeksaun durante funu ne’e, responde ba ida ne’e iha loron hira deit Florense organiza enfermera sira husi kongregasaun  oin-oin mais o menus 38 hodi ba halao misaun ida ne’e.  Wainhira Nightingale ho nia enfermera sira to’o iha Scutari, hospital  Barrack  baze   ba soldadu Britania sira  iha  Constantinople, iha ne’eba kondisaun aat liu, menús bee mos, ekipamentu médiku menus, kondisaun ijiéniku laiha, prezensa animal rodentor hanesan laho, barrata no seluk tan, kondisaun hirak ne’e  halo  soldadu barak mak mate tamba infeksaun hanesan kólera no tifus. Florence hanaran fatin ne’e  “The Kindom of the Hell” . Maibe situasaun ida ne’e la dezanima Florence atu hahu halao servisu,  Florense husu ajuda ba soldadu hirak ne’ebe la dun afektadu atu ajuda nia hodi hamoos kondisaun iha ambiente hospital ne’e. Ho Florence no nia ekipa nia prezensa sira  konsegue redús mortalidade husi  40 %  tun ba 2 %

 Hahu husi ne’e Florense komesa nia servisu hodi tau matan ba soldadu sira, husi fatin  ida ba fatin seluk, lao iha nakukun laran  ho deit   ahí oan kiik,  nune’e soldadu sira ne’ebe nia atende senti komfortabel ho nia asaun sira hodi  bolu nia “ The Lady with the Lamp”. No seluk fali bolu nia “The Angel of the Crimea”   

Hafoin hadia kondisaun sanitaria sira iha hospital refere, Florense mos establese fatin tein ba moras hirak ne’e, fatin fase ropa nune’e mos establese Biblioteka  ba soldadu moras sira.

Iha tinan 1856 hafoin funu Crimean hotu, nia  mos fila ba nia rai fatin moris, iha ne’eba ema simu nia hanesan Eroína, no rekoñesemntu no prezente husi Reína Victoria, nune’e mos osan  $ 250,000 ho osan sira ne’e  Nightingale harii  hospital St. Thomas iha ne’eba mos komesa establese eskola enfermajem ho naran Nightingale Training School for Nurses.  

Florence Nightingale, hetan admirasaun no apresiasaun públiku iha Britania, konsidera nia  hanesan figura públika ne’ebe sai inspirasaun ba feto joven sira, hahu iha ne’ebe públiku komesa hare’e katak servisu enfermeru(nursing) ne’e vokasaun ida  no laos ema kiik no kiak nia servisu.  Nightingale mos hakerek  artigu balu kona ba experiensia sira durante funu crimean nian no oinsa bele halao manajementu ida ne’ebe diak iha hospital militar sira, ho nia matenek hanesan statisian ni amos kria  gráfiku PIE CHART ne’ebe ohin loron ita uza iha aprezentasaun data sira.  

Imajén Pie Chart

Notisia triste mak wainhira halao misaun iha Hospital  Scutari, iha tinan 1857  mak nia (Florence Nightingale), hetan infeksaun Brucellosis nune’e  halo nia  loron-loron iha deit toba fatin(hahu nia tinan 38-too nia mate), labele tan halao servisu iha fatin seluk Maske nune’e  nia nafatin hato’o nia idea no lidera nafatin reforma iha hospital sira. Politiku sira dala ruma visita nia iha uma hodi konsulta  husu nia opiniaun. Istória seluk mak maski nia iha deit toba  fatin maibe durante funu sivil  iha estadus unidus, ema nafatin husu nia idea oinsa atu maneija hospital sira iha terrenu.

 Servisu barak mak reforma durante epoka ne’eba ho  Nightingale nia ideolojia, iha tinan ikus sira nia moris nian maske iha deit toba fatin nia kontinua influencia servisu saúde públiku(hospital) sira iha Britania, Estadus Unidus no India. Iha 1907 nia simu kondekorasaun Order of Merit husi  King Edward.   Florence Nightingale simu apresiasaun no kondekorasaun barak tebes,  númeru libru  no artigu ne’ebé nia hakerek  liu husi 150.

Iha loron  13 fulan Augustu 1910, nia mos hakotu iis tamba moras ne’ebe afeta nia, antes nia mate nia husu atu nia prosesu funeral halao bain-bain deit, maske públiku konsidera nia hanesan figura no éroina.

Referensia

1.        Florence Nightingale | National Women’s History Museum [Internet]. [cited 2020 May 12]. Available from: https://www.womenshistory.org/education-resources/biographies/florence-nightingale

2.        Fee E, Garofalo ME, Chang BB. Florence nightingale and the crimean war. Vol. 100, American Journal of Public Health. American Public Health Association Inc.; 2010. p. 1591.

3.        Florence Nightingale - Quotes, Education & Facts - Biography [Internet]. [cited 2020 May 12]. Available from: https://www.biography.com/scientist/florence-nightingale

4.        Florence Nightingale | Biography & Facts | Britannica [Internet]. [cited 2020 May 12]. Available from: https://www.britannica.com/biography/Florence-Nightingale

5. Young D A B. Florence Nightingale's fever BMJ 1995; 311 :1697

KREATIVIDADE BELE PROTEJE PROFESIONAL SAÚDE HUSI COVID-19 “ALTERNATIVE GOOGLE MASK”, MÉDIKU ERMERA

Editor publikasaun no narativa : dr. Maniv

Inventór google "mask": dr. José Adão Exposto. (Sentru Saude Internamentu Glenu-Ermera)

Liafuan Makloke

Hanesan  John Kennedy hatete " Labele husu saida mak nasaun atu halo ba o, maibe husu ba o nia an,  saida mak o atu halo ba nasaun"  liafuan kmanek ida ne'e mak motiva dr. Jose hodi buka maneira atu kontribui  ba nasaun iha tempu difisil ida ne'e,  iha kontestu atual liu-liu knaar nain sira ne'ebe  hanesan kombatente iha liña oin tenki hetan protesaun atu nune'e bele  garante asistensia no funu hasoru inimigu ne’ebe  ita labele haree ho matan "COVID-19".

Iha realidade atual kuaze profesional saude barak iha nasaun sira buka rasik maneira atu kria ekipamentu protesaun pesoal(EPI) nune'e bele proteje an hasoru COVID-19, nune'e mos iha Timor Leste, iha Munisipiu  Ermera mediku sira foti inisitaiva hodi kria maskara alternativa ida hodi troka "Google mask"konvensional.

Mai ita akompaña   kreatividade ida ne'e nia prosesu sira iha esplikasaun no video tuir mai.

                                                            Preview

Esplikasaun kona ba prosesu atu inventa, Sasan ne’ebe persiza : Portafolio ,Kateri,PlástikuTransparante, Alikate ,Perforador,Elástiku no,Goma tiru. Haree iha imajen sira tuir mae ne'e :

Kateri

Plástiku Transparente

Alikate

Elástiku

Goma Tiru

Prosesu kompletu mai ita akompaña video tuir mai ne’e :

REZULTADU

Profesionál Saude sentru Saude Glenu uza  Face Yields ne'ebe prodús husi dr. Jose A. Exposto